काठमाडौं : सत्तारुढ दल नेपाल कम्युनिष्ट पार्टी (नेकपा) को सचिवालय बैठक सारिएको छ । बुधबार दिउँसो १ बजेका लागि बोलाइएको बैठक दिउँसो २ बजेका लागि सारिएको हो ।
पार्टी महासचिवसमेत रहेका अर्थ मन्त्री विष्णु पौडेलले एक घण्टा सयम मागेका लागि बैठक सारिएको प्रवक्ता नारायणकाजी श्रेष्ठले जानकारी दिए ।
‘महासचिव पनि बैठकमा आउने कुरा थियो । तर, उहाँले विशेष काम परेकाले एक घण्टा समय माग्नु भयो । हामीले उहाँका लागि बैठक २ बजेका लागि सारेका छौँ,’ प्रवक्ता श्रेष्ठले भने ।
प्रधानमन्त्री एवं नेकपा अध्यक्ष केपी शर्मा ओलीले केही समय बैठक नबस्न गरेको आग्रहका बाबजुद आज पुनः सचिवालय बैठक बस्न लागेको हो । सो बैठकमा अध्यक्ष ओली र अर्का अध्यक्ष पुष्पकमल दाहाल ‘प्रचण्ड’ले प्रस्तुत गरेको प्रस्तावमाथि छलफल हुने जनाइएको छ ।
मंगलबार बैठकमा ओलीले प्रचण्डको प्रस्ताव फिर्ता लिनु पर्ने र त्यसमा छलफल अघि बढाउन नहुने प्रस्ताव गरेका थिए । तर, अधिकांश सदस्यले दुवै अध्यक्षको प्रस्तावमा छलफल अघि बढाउने बताएपछि ओलीलाई ‘धक्का’ लागेको थियो ।
ओलीले केही समय अनौपचारिक छलफल गरेर मात्रै पार्टीका कमिटिहरुका बैठक बस्नु पर्ने बताएका थिए ।
ओलीले आफू बुधबारको बैठकमा उपस्थित हुन नसक्ने बताएका थिए । ओली बुधबारको बैठकमा सहभागी हुने–नहुने अनिश्चित नै छ । ओली पक्षले उनी बैठकमा सहभागी नहुने बताएको छ । प्रचण्ड पक्षले भने अन्तिम समयसम्म पर्खिने बताएको छ ।
यो पनि
प्रकाशित : मंसिर १७, २०७७
