काठमाडौं । प्रमुख प्रतिपक्षी दल नेकपा एमालेका नेता डा.भीम रावलले प्रधानमन्त्री शेरबहादुर देउवाले आफुविरुद्ध दिएको अभिव्यक्तिलाई लिएर टिप्पणी गरेका छन् ।
नेता रावलले प्रधानमन्त्री देउवाले आफूमाथि दिएको अभिव्यक्तिमा सत्यता नभएको दाबी गरेका छन् । आज नुवाकोटमा आयोजित एक कार्यक्रममा बोल्दै प्रधानमन्त्री देउवाले एमसिसी परियोजनाबारे रावलले दुई जिभ्रे कुरा गरेको बताएका थिए ।
केपी शर्मा ओली नेतृत्वको सरकारमा भीम रावल २०७३ असार ३१ मा उपप्रधानमन्त्री रहेको र त्यो मन्त्रिपरिषदले एमसिसी परियोजना अनुमोदनका संसदमा प्रस्ताव लैजाने निर्णय गरेको देउवाको भनाइ थियो ।
ओलीले अघि बढाएको एमसिसी परियोजना आफूले प्रतिनिधि सभाबाट पारित गरेको देउवाको भनाइ थियो । साथै देउवाले मन्त्री हुँदा रावलले एमसिसीबारे विरोध नगरेको तर अहिले विरोध गरेकोमा त्यसबेला दिमाग खुस्किएको थियो भन्ने प्रश्न गरेका थिए।
प्रधानमन्त्रीले आक्रोशपूर्ण अभिव्यक्ति दिएको केही समयमै रावलले ट्वीटबाट जवाफ दिँदै प्रधानमन्त्रीले तथ्यहीन कुरा गरेको बताएका छन् । उनले एमसिसी संसदमा ल्याएका बेला आफू उपप्रधानमन्त्री नरहेको पनि बताएका छन् ।
‘सार्वजनिक तथ्यको जानकारीसम्म नराखी झुठा बोल्ने प्रधानमन्त्री या त आफ्नै दिमाग खुस्केर होस हराएको हुनुपर्छ या जनतामा भ्रम छरेर देशहितविरूद्धको कत्य छोप्ने कुत्सित चाल हुनुपर्छ,’ रावलले भनेका छन् । आफू देशभक्त नागरिक भएकोले राष्ट्र हित र अस्मिताप्रति चिन्तित भएर टाउको दुखेको रावलको भनाइ थियो ।
प्रधानमन्त्री देउवाले एमसिसीबारे रावलको मात्रै टाउको दुखेको बताएका थिए । डा.रावलले ओलीले एमसीसीको सम्झौता संसद्मा ल्याएको बेला नभई केपी ओली पहिलो पटक प्रधानमन्त्री हुँदा आँफु रक्षामन्त्री र उपप्रधानमन्त्री भएको समेत बताएका छन् ।
प्रमं देउवाले नुवाकोटमा मेरो बारेमा दिएको अभिव्यक्ति कति झुठा र उदण्डतापूर्ण छ, तथ्य हेरौं : pic.twitter.com/7aoA854K9I
— Dr. Bhim Rawal (@BhimRawal179) March 14, 2022
