काठमाडौं । रुसी फौजले आक्रमणलाई निरन्तरता दिइरहेको पूर्वी युक्रेनको पोपास्ना शहरबाट युक्रेनी सैनिक पछि हटेका छन् । पूर्वी युक्रेनको लुहान्स्क क्षेत्रका गभर्नरले आफ्ना सैनिक पोपास्ना शहरबाट पछि हटेको पुष्टि गरेको अन्तर्राष्ट्रिय समाचार संस्था रोयटर्सले जनाएको छ ।
यसअघि रुसको चेचेन्या गणतन्त्रका प्रमुख रमजान कदिरोभले आफ्ना फौजले पोपास्ना कब्जा गरेको घोषणा गरेका थिए । लुहान्स्का गभर्नर शेरी हाइदाइले युक्रेनी टेलिभिजनलाई अन्तरवार्ता दिँदै युक्रेनी फौज शहरबाट पछि हटेर अझ मजबुत स्थानमा पुगेको जानकारी दिएका हुन् । उनले शहरमा ‘सबैकुरा नष्ट भएको’ समेत बताएको रोयटर्सले जनाएको छ ।
पछिल्लो समय पूर्वी युक्रेनको लुहान्स्क र डोनेत्स्क क्षेत्रमा रुसी फौजले थप जमिन कब्जा गर्ने उद्देश्यले आक्रमणहरुलाई निरन्तरता दिइरहेको अन्तर्राष्ट्रिय सञ्चारमाध्यमहरुले जनाएका छन् ।
