काठमाडौं । स्थानीय तह निर्वाचनको मतगणना जारी छ। केही स्थानीय तहको अन्तिम मतपरिणाम आइसकेको छ। पालिकादेखि वडा कार्यालयको समेत अन्तिम मतपरिणाम आइरहेको छ।
सार्वजनिक नतिजाअनुसार नेपाली कांग्रेस, एमाले, माओवादी केन्द्रलगायतका दलका उम्मेदवारहरूबीच नै प्रतिस्पर्धा चलिरहेको छ। कतिपय ठाउँमा स्वतन्त्र उम्मेदवार पनि विजयी भएका छन्। विजयी हुने र उनका प्रतिस्पर्धीको मतान्तर धेरै देखिँदैन।
कतिपय उम्मेदवारहरूले आफ्नोबाहेक अरू कसैको पनि भोट पाउन सकेको देखिँदैन। अर्थात् उनीहरूले एक मत मात्र पाएका छन्। त्यो उनी आफैंले दिएको मत मात्र। या कुनै एक व्यक्तिले मात्र दिएको मत हो।
यतिसम्म कि उनीहरूलाई आफ्नै घरका सदस्यहरूले समेत पत्याएको देखिँदैन। मनाङको मनाङ ङिस्याङ गाउँपालिकामा उम्मेदवार बनेका यामयाङ टासीलाई आफूबाहेक कसैले पनि पत्याएनन्। राष्ट्रिय प्रजातन्त्र पार्टीबाट उम्मेदवार बनेका टासीले एक मत मात्र पाए।
जहाँ एमालेका कान्छा घले निर्वाचित भएका थिए। उनले ८ सय ६१ मत पाएका थिए। ३ हजार ५ सय ३५ मतदाता रहेको ङिस्याङमा एक हजार पाँच सय ७४ मत खसेको थियो। तर, टासीले एक मत मात्र पाए।
धादिङको ज्वालामुखी गाउँपालिकाको वडा नम्बर २ को वडाध्यक्षका लागि उम्मेदवारी दिएका एकीकृत समाजवादीका उम्मेदवार दिवश कार्कीले एक मत मात्रै पाए। २९ वर्षीय कार्कीले आफ्नो मात्र भोट पाएका हुन्।
वडाध्यक्षमा ६ सय २० मत ल्याएर कांग्रेसका राजु लोप्पा विजयी भए। उनका प्रतिस्पर्धी माओवादी केन्द्रका अर्जुन शाही ठकुरीले ६ सय १७ मत पाए। ३ मतको अन्तरले लोप्पा विजयी भएका थिए। १ हजार ७ सय ७४ मत खसेको थियो।
धादिङ र मनाङका उम्मेदवारले मात्र नभएर अन्तिम मतपरिणाम सार्वजनिक भइसकेका कतिपय स्थानीय तहका कतिपय उम्मेदवारले एक मत मात्र पाइरहेका छन्। यस्ता उम्मेदवारको धरौटीसमेत जफत हुनेछ।
नगरपालिका वा गाउँपालिकाको प्रमुख पदमा उम्मेदवारी दर्ताका लागि १५ सय रुपैयाँ धरौटी राख्नुपर्छ। त्यसमा महिला, दलित तथा अल्पसंख्यक समुदायका वा विपन्न उम्मेदवारलाई आधा छुट हुने व्यवस्था छ।
वडाध्यक्षका लागि एक हजार र सदस्यका लागि ५ सय रुपैयाँ धरौटी तिर्नुपर्छ। उम्मेदवारले सदर मतको १० प्रतिशतभन्दा कम मत ल्याएको अवस्थामा त्यस्तो धरौटी जफत हुने व्यवस्था छ। जफत भएको रकम सञ्चित कोषमा जम्मा हुनुपर्ने नियम छ।
यसअघि २०७४ सालको स्थानीय तह निर्वाचनमा ५० भन्दा बढी नगरपालिकाका उम्मेदवारले एक मत मात्रै पाएका थिए। काठमाडौं, भक्तपुर, ललितपुरदेखि कतिपय जिल्लाका नगरपालिकाको मेयरका उम्मेदवारले नै एक मत मात्र पाएका थिए। त्यस्तै वडाध्यक्ष, वडासदस्यका उम्मेदवारले पनि त्यसरी नै आफ्नोबाहेक अरू कसैको मत पाउन सकेनन्।
