कालीकोट : जिल्लाको पलाता गाँउपालिका १ खाँडामा भीषण आगलागी हुँदा ८० घर जलेर नष्ट भएका छन् । आइतबार राति करिब २ बजेदेखि लागेको आगो अझै नियन्त्रणमा आइनसकेको प्रहरीले जनाएको छ । करिब सात घण्टाको पैदलपछि पुगिने खाँडामा भर्खरै मात्र प्रहरी पुगेको छ ।
केही समयअघि मात्रै १६ जना प्रहरीको टोली घटनास्थल पुगेको र आगो निभाउने प्रयास जारी रहको स्थानीयले जानकारी दिएका छन् ।
जिल्ला प्रशासन कार्यालयका अनुसार आगो नियन्त्रणा बाहिर छ । थप सहयोगका लागि नेपाली सेनाको टोली थिर्पुबाट घटनास्थल जाँदैछ ।
आगलागीमा परी थुप्रै चौपायहरु जलेर मरेको, लत्ताकपडा, अन्नपातलगायत धनमालहरु जलेर नष्ट भएको छ ।
पलाता सुख्खाग्रस्त क्षेत्र हो । पानीको स्रोत नजिक नभएकोले आगलागी नियन्त्रण गर्न कठिन भएको छ । मानवीय क्षतिबारे जानकारी प्राप्त भएको छैन ।
घटनास्थल कालीकोटको सदरमुकाम मान्मबाट २१ कोष टाढा बाजुरा नजिक पर्छ ।