कैलाली: सुदूरपश्चिम प्रदेशको राजधानी गोदावरी तोकिएपछि राष्ट्रिय पत्रिकाहरुले गोदावरी तेघरी राजधानी हुनु नपर्ने समाचार छापेको भन्दै अत्तरियाका स्थानीय युवाहरु आक्रोशित बनेका छन् ।
प्रदेश सरकारको बहुमतबाट प्रदेशको राजधानी तेघरी गोदावरी सिफारिस गरिएपछि राष्ट्रिय पत्रिकाहरुले चुरे खतरामा, बाँधको बाटोमा राजधानी लगायतका शिर्षकहरु राखेर समाचार प्रकाशित गरेका थिए ।
आक्रोसित युवाहरुले नेपालगञ्जबाट गाडीमा सुदूपश्चिमका विभिन्न जिल्लाका लागि पठार्इएका कान्तिपुर दैनिक, नागरिक दैनिक, अन्नपूर्णपाेष्ट दैनिक लगायतका राष्ट्रिय पत्रिकाहरु अत्तरिया चोकमा जलाएका छन् ।
अत्तरिया र सात पहाडी जिल्लाका लागिजाने सबै पत्रिका जलाएको अत्तरियाका विक्रेता यज्ञराज जोशीले बताए । उनको अत्तरियास्थित निलम पुस्तक पसल अगाडी राखिएका पहाडी सात जिल्ला र अत्तरियाको सबै पत्रिका जलाइएको हो ।
गोदावरी नगरपालिकाको गोदावरी वनमा स्थायी राजधानी तोकेको विरोधमा धनगढीमा आन्दोलन भएको थियो । पत्रपत्रिकाले अत्तरिया राजधानीको विरोधमा समाचार छापेको आरोप लगाउदै अत्तरियाका केही युवाले समूहले अन्नपूर्ण पोष्टका साथै कान्तिपुर, नागरिक दैनिक पनि जलाएका प्रत्यक्षदर्शीले बताएका छन् ।
अत्तरियाबाट महेन्द्रनगरतर्फ गाडी गइरहेका बेला गाडीबाटै थुतेर पत्रपत्रिका जलाएको विक्रेता यज्ञराज जोशीले बताए ।
