महोत्तरी : महोत्तरीको बर्दिवासमा स्थानीय प्रशासनले बुधबार बिहानदेखि बिहीबार बिहानसम्मको लागि निषेधाज्ञा जारी गरेको छ ।
बुधबार बिहान ८ सुरक्षा समितीको बैठकले बुधबार बिहान ९ बजेदेखि बिहीबार बिहान ६ बजेसम्मको लागि निषेधाषा जारी गरेको हो ।
६ वर्षीया बालिका गुलाब साह खातुनको हत्याको विरोधमा उत्रिएका महोत्तरी बर्दिवासका स्थानीयमाथि प्रहरीले गोली चलाउँदा घाइते भएकामध्ये एक जनाको मृत्यु भएपछि सम्भावित अप्रिय घटनालाई रोक्न स्थानीय प्रशासनले निषेधाज्ञा जारी गरेको हो ।
प्रमुख जिल्ला अधिकारी कृष्ण बहादुर कटुवालका अनुसार पूर्वमा वार्ड नं १ को रातो खोला, पश्चिममा वार्ड नं ५ को माइस्थान, उत्तरमा वार्ड नं ३ को पाटु र दक्षिणमा वार्ड नं ८ को क्वार्टर चोकमा निषेधाज्ञा जारी गरिएको छ ।
निषेधाज्ञाको अवधीभर यस क्षेत्रमा ५ जनाभन्दा बढी भेला हुन पाइने छैन । निषेधाज्ञाको अवधिमा राजमार्ग भने सुचारू रहने प्रमुख जिल्ला अधिकारी कटुवालले बताएका छन् ।
यो पनि
बालिका बलात्कारपछि हत्या : प्रहरीको गोली लागि घाइते भएका सञ्जयको मृत्यु
प्रकाशित : मंसिर १०, २०७७
